平時我唔寫呢啲嘢嘅 但呢排見到幾個後生成日問點做好呢行 問到我煩 索性寫低算 寫完以後唔使再答
第一件 唔好信個客話「我好認真搵」十個講呢句嘅九個半冇影 真正認真嗰啲反而唔出聲 靜靜睇完就落訂
第二件 你帶客睇完一個鐘佢話「我再諗下」唔好嬲 呢句唔係拒絕 只係你未搵到佢嗰個痛點 下次再約佢之前搵清楚佢到底擔心啲乜
第三件 唔好同行家爭 你劈佣搶到嘅客下次一樣會因為人哋劈多啲走 冇忠誠度嘅客唔值得你蝕
第四件 個市好嗰陣唔好以為係自己叻 個市差嗰陣唔好以為自己無用 兩樣都係市場 你只係其中一個人 有好多人喺你隔離幫緊你 但你的確係真係得你一個人行出去面對個客
第五件 舊客係你最大嘅資產 我而家六成生意係舊客轉介 但呢六成花咗我五六年時間去build冇shortcut 不過你記住第四件 你一個人build唔到 係成個team幫你keep住啲客先做到
第六件 學識分邊個客值得花時間 有啲客帶佢睇二十次佢都唔會簽 唔係佢嘅問題 係你一早應該放手 但放手好難因為你已經投入咗時間
第七件 呢行最難唔係搵客唔係簽約唔係帶睇 係你禮拜日想休息但手機響你要唔要接 接咗可能係單大嘢但九成九唔係 我而家都仲未搵到平衡
第八件 唔好睇唔起後勤嗰班人 我做咗十年先真正明白佢哋做嘅嘢有幾煩 你出去簽到客返嚟仲要等佢哋搞 如果佢哋慢咗就係成件事慢 你對佢哋好啲大家都好過
第九件 有時你做晒所有正確嘅嘢個客都唔會簽 呢個唔係你嘅錯但你會覺得係 做得越耐你越要識得放低呢種感覺唔好帶返屋企
第十件 做呢行最重要唔係叻唔係靚仔唔係識講嘢 係你頂唔頂得住 頂到嘅人留低 頂唔到嘅人走咗 冇人會記得走咗嗰啲人 但留低嗰啲人會記得自己點解仲喺度
寫完先發現十件嘢有七件都係教你點樣接受同點樣做人而唔係點樣成功 可能呢個就係呢行嘅真相
算啦再寫多一件
第十一件 條數大唔係大晒 呢句唔係插緊啲做得好嘅人 但我見過太多人一開始有條好大嘅數就覺得公司冇咗佢唔得 就算佢喺公司點樣佢都覺得冇所謂 你記住第四件 你一個人行出去你會做得到 但你覺得容易做到係因為有好多人喺背後不斷幫你協調 有制度有人有流程 如果你因為自己有數就囂張跋扈覺得自己最叻 就算你真係賺到錢但你唔識感恩 你係唔會做得更好 你只會被自己造成嘅嘢反噬 開到單當然爽 開到好多單更加爽 有錢更加爽 但你唔能夠因為錢冇咗你自己做人嘅特質 你自己唔覺你享受緊你嘅成功但同時間做咗啲冇辦法挽救嘅嘢 嗰種後悔嘅感覺教訓好大經驗好大但真係唔抵 如果你想搵得更多 你一定要尊重同愛惜你身邊嘅每一個人 就算佢只係一個好普通嘅人
[由舊站搬遷恢復，附件與收藏資料未完全同步]
