唔知點解今日想寫呢篇
可能係啱啱過咗入行兩年
想記低啲嘢
怕遲啲自己都唔記得
第一個月出糧
底薪一萬零五
聽落好似唔差
但你計晒所有數
一萬零五喺香港做到啲乜
食飯交通電話費
著得似個人返工要一套衫
落袋嗰啲真係冇剩幾多
你話靠commission
我同你講劏房嗰啲commission
一間房月租三千
半佣
得一千五
你帶個客行咗三四棟唐樓
出一身汗
件恤衫濕到可以擰出水
最後開到單
一千五
你自己計下時薪幾錢
好少少嗰啲月租一萬二
聽落好似好啲
但半佣六千
再扣公司嗰part
真正落到你手都唔知剩幾多
熟客有半佣
新客又睇情況
有啲數仲要喺佣金度扣
你以為一萬二嘅盤好好做
計完同三千嗰啲差唔到去邊
有啲人話做住宅租務好啲
富貴客嗰啲
但你以為豪宅就冇劏？
有啲地方本身係一個豪宅
劏開四間
入面一間大房
租金都係五六千一間
大啲嗰啲要萬蚊
仲未計其他配套
淨係講個窗已經講咗好耐
公司乜嘢盤都有
豪宅劏房 辦公室劏房
仲有啲好奇怪嘅
做到好似迷你倉就叫一間office
做到好似個櫃就話一間住人嘅房
乜類型都有
有時都唔到你揀
太過份嗰啲我唔做
對唔住自己 對唔住人
你賺嗰一千幾蚊 瞓唔著
但你唔做 人哋做
呢行就係咁
所以我話做劏房嘅就係牛馬
日日拉住架車行上山
條路越行越斜
你做多啲只係代表你行多幾層樓梯
正常嗰啲盤
大部分都喺五六千玩
冇窗嗰啲四千
有窗即刻多兩千
放兩張枱六千
想大少少有個窗八千
你以為差好遠
其實每個價位要嘅嘢都差唔多
啲嘢唔會有咩變化
除非金額多啲
就好似有人將啤牌同UNO撈埋一齊
跟住話你玩
咁你咪睇吓點玩囉
百貨應百客
可能一百個人覺得嗰間房
冇窗 好細 地方又遠
但偏偏有個人就鍾意平
佢覺得啱佢
公司乜嘢都有
真係睇你點樣做
所以每一日都好似抽獎
個客係咩人 佢心入面諗緊乜
你帶佢睇十幾次都有
唔同日子 唔同盤
有一次帶個客行咗四棟唐樓
第一棟上到去 佢望咗兩眼話太細
第二棟行到一半佢已經話唔使上去喇
第三棟 佢上到去望完話再諗下
第四棟 佢喺二樓就話算啦太熱
四棟 加埋行咗成廿幾層
件恤衫濕到可以擰出水
佢同我講「唔該晒你 我再考慮」
跟住就走咗
你企喺街邊
一個人
對腳痛
件衫未乾
電話一睇 下一個客又話改期
嗰種感覺
就好似你一直喺個井底
手攀到喺井邊
望到外面啲光
跟住隻手一滑
又跌返落去
仲有一種唔係人鬧你嘅辛苦
係你自己鬧自己
有啲盤你帶人去睇
冇窗 細到好似個櫃
個客望住你唔出聲
你自己都覺得唔好意思
但你要企喺度 笑住同佢講
「呢個價位嘅選擇係咁」
嗰個moment
你唔係俾人鬧
係你自己心入面有把聲
好多人創業
租間房做生意
五六千對好多人嚟講都唔平
有啲人做做下 頂唔順 就走咗
或者想轉大啲 想有個窗
但要價錢唔變
咁其他配套就好奇怪
搞嚟搞去大家都係嗰五六千度兜
你同佢傾落其實好開心
因為大家搵嘅錢我相信唔會爭好遠
有啲人真係覺得五六千已經好手緊
有啲做做下又租唔到
可能生意難做
你睇住佢哋嗰個樣
你唔好意思賺佢啲錢
但你唔賺 你自己都冇飯食
有陣時帶個客
佢本身睇緊三千幾
但你覺得佢值得好啲
咁你帶佢去睇一個六千嘅
佢一入去就唔同
因為佢一直冇新嘅嘢入到佢個腦
你幫佢跳出嗰個框
呢個我覺得好重要
但係好睇人
第六個月先叫穩定少少
一個月做到五六單
加埋可能萬幾蚊commission
加底薪
OK 叫做活得到
唔似做豪宅一單食半年
我哋呢啲係用條命換錢
而家做咗兩年
七八單 有時十單
開始有repeat客
有啲業主指定搵我
舊客轉介多咗
呢啲先係最值錢
你問我學到乜
唔係咩sales technique
係真誠
我知呢兩個字好老套
但你諗下
你賺得幾多錢 幾千蚊
你呃得幾多
你對得住自己？
同埋啲客自己做生意
人哋唔係蠢㗎
佢未必熟呢行
但佢知道啲嘢
你求其講啲嘢開到一單
好短暫
淨係一個客咁做
冇下次
但如果你真誠
啲客睇得出
轉介就係咁嚟
所有生意我覺得都係真誠
我唔記得係咪李嘉誠自傳入面講
定係邊個生意佬咁講
嗰陣聽完覺得又係啲成功學廢話
但而家自己做落去
唔通呢個真係其中一個竅門
一個好關鍵嘅竅門
就係對人好？
我喺度停一停先
因為我唔知搵錢多嘅人係咪都收埋咗呢個秘密
但起碼我依家憑住呢樣嘢
好似打開緊一道新嘅門
有時覺得自己好似愚公
日日擔泥行上山
座山冇細過
但我企嘅位高咗
以前喺井底望上去只見到一個圓
而家隻手攀到喺井邊
望到外面 但仲未爬出去
我好自私
因為講完可能好多人同我爭飯食😂
但我都想幫到更多人
睇住嗰啲開公司嘅人
幾千蚊交唔起租
大家都係一直喺度捱
上一代嘅人成日話
所有嘢都係捱出嚟
我唔知係咪真
但我有共鳴
蒙羅麗莎嘅面紗我掂到喇
我期望可以睇到佢嘅真面目有幾靚
遲啲再update😂
[由舊站搬遷恢復，附件與收藏資料未完全同步]
