好啦講正經
自從上個月部機又 jam 紙何生終於講咗句「不如換部新嘅」。我當時聽到眼都光埋因為我由入職第一日嗰部機就 jam 到今日。三年。三年我同佢鬥咗幾百次。而家佢嘅拉紙轆已經磨到見白色，拉紙轆你知唔知咩嚟？唔緊要啦你總之知有樣嘢叫拉紙轆，負責將紙拉入去部機嗰個膠轆嚟㗎，磨到見白色即係佢已經冇力攞紙，你放十張入去佢攞到三張另外七張卡住。掀開個蓋你仲見到舊年芬姐個 statement 嘅碎紙黐住喺入面我都唔知點入到去嘅。Jessica 叫我唔好當真話何生講吓啫。但我已經做落去喇我 OT 咗三個禮拜打咗十二個 vendor 電話 V仔可以作證有幾次我問佢 network print 點 set 佢已經想 block 我。上網睇 spec sheet 睇到近視又深咗。
我知你哋做地產唔識 printer 所以我用盤嚟比喻。你哋識盤唔識機噉我遷就你哋。
首先第一個登登登登登。。。。。。Ricoh！！！
唐樓翻新盤嚟㗎呢部機。你帶客上去佢第一眼唔會嘩嘅。門口油漆普通走廊燈光唔夠浪漫個信箱仲係舊式嗰種。你攞部 Ricoh 出嚟擺喺度佢嘅外殼灰灰地個 mon 細細個按鍵 layout 似上世紀嘅設計你會覺得邊度搵返嚟㗎呢部。但係你住落去先知。水喉唔漏石屎夠紮冬暖夏涼。你撳印佢出你再撳佢又出你印二百頁中間唔停一次。你知點解唔停？因為佢嘅送紙路徑係直路嚟㗎，送紙路徑即係紙張由你放入去到出返嚟行嘅路線，其他 brand 嘅紙要轉兩個彎先出到嚟，Ricoh 係儘量行直路紙歪少少都過到唔會卡。碳粉呢你可以用副廠即係唔使買原廠嗰啲貴嘅，副廠即係其他廠出嘅相容碳粉，你知啦好似你買墨水筆芯都有原廠同副廠嘅分別，副廠平好多效果差少少但日常用夠晒。維修師傅你打電話第二日到。我問咗三間 vendor 佢嘅每頁成本全場最低，有一間 vendor 同我講「Ricoh永遠有貨」呢句我記到而家。彩色呢就一般般你印 proposal 嗰個 cover page 出嚟嗰個紅色會偏橙，但你日日印嘅係合約同 listing 唔係畫展。我自己行政部日日印幾百頁就係要呢隻，好似做租務咁穩定收租唔使諗你幾時見過唐樓翻新盤空租？冇㗎嘛佢唔靚但佢實。
第二個登登登登登。。。。。。Canon！！！
大型屋苑。會所游泳池健身室兒童遊樂場管理員著西裝笑住同你講早晨。你搬入去覺得乜都有但你行完一圈你搵唔到一樣令你嘩一聲嘅。佢有個系列叫 imageRUNNER ADVANCE DX，你唔使記住呢個名你總之知佢係 Canon 出俾辦公室用嗰隻就得。雙面列印有掃描有彩色有 Wi-Fi 有。個 touchscreen 大到何生都唔會撳錯你知何生對電子嘢幾苦手㗎啦。但呢部機有一樣嘢係我覺得值得講嘅，佢雙面印出嚟正反面嘅字冇移位。你攞張紙對住光照前面嘅字同後面嘅字對得齊齊㗎。呢個技術叫 registration accuracy 唔使記住總之知佢翻面之後唔係求其印第二面而係用感應器重新對位先印。你哋做租約做 proposal 雙面釘裝之後如果啲字歪晒你遞俾業主佢翻開嗰刻對你個印象會打折㗎嘛。碳粉成本中等唔平唔貴好似管理費咁你唔覺得貴但月月都要畀。我打去 vendor 問有冇嘢可以彈嘅佢諗咗好耐話「真係冇乜好彈」。你係銷售員你同客講冇嘢好彈？但呢個就係 Canon 佢悶到你揀佢唔會興奮但你唔會後悔。成間公司如果只可以買一部就買 Canon 你唔會訓街亦唔會訓得好好。同揀大型屋苑一樣你每月準時交管理費佢每月準時唔出事。
第三個。。。呢個要解釋下。。。Fuji Xerox。。。
等等而家仲叫唔叫 Fuji Xerox 呢？因為佢今年四月正式改名喇改做 FUJIFILM Business Innovation。點解改？因為佢同 Xerox 嘅合作協議到期佢哋拆夥喇以後唔用 Xerox 個名。即係點呢？即係好似收購重建咁嗰棟樓你住咗好多年管理公司突然換人你問管理處佢話我哋唔叫呢個名喇你問叫咩佢講咗串英文你即刻唔記得。我打去 vendor 有一間仲係叫佢做Fuji Xerox嘅我糾正佢佢話「啊係喎而家唔叫呢個名」連 vendor 都未搞清楚你話幾亂。部機本身冇問題㗎其實！！佢個 controller 係業界最快之一，controller 即係部機入面嘅腦，你撳完印到出第一頁中間嗰幾秒就係 controller 喺度計緊嘢。Fuji Xerox 嘅 controller 係自己研發唔係買外面嘅。你撳完印佢出第一頁快過其他 brand 三到五秒。你覺得三秒好少但你一日印五十次就成四分鐘一個月就兩個鐘。V仔話佢 IT 嗰邊都收到消息話 driver 同 software 要換晒新佢自己都仲搞緊。我打去三間 vendor 兩間話舊型號停產新型號仲未齊報價拖咗成個月冇回覆。你已經用緊嘅唔使急住換但你新買就而家真係唔好落場住，個業主搞緊大裝修你入唔到場睇俾錢都入唔到。等半年啦。
登登登登登登登登。。。。。。。！！！豪宅！！！Konica Minolta！！！
好喇呢個我要慢慢講。地段好用料靚管理費貴到你懷疑人生但你入到去望住個海景就覺得值。呢部機出名在佢嘅碳粉叫 Simitri HDE。碳粉你知啦即係影印機入面嗰樽粉佢噴落紙面印出嚟嗰個。一般碳粉嘅粒子係圓形嘅你可以想像好多粒波波撒落紙面有啲位波波多啲有啲位少啲所以印出嚟有啲位深啲有啲位淺啲。你印第一頁嗰陣 OK 冇嘢嘅但你印到第三百頁碳粉鼓溫度升高呢個偏色就越嚟越明顯。Simitri HDE 嘅粒子唔同佢嘅融化溫度低過傳統碳粉，融化溫度低即係乜呢即係佢唔使咁高溫就印到所以碳粉鼓負荷少溫度升得慢。結果就係你攞第一頁同第五百頁出嚟並排放你分唔出邊張先印。我喺 vendor 嗰度見到 demo 嗰陣講咗句「嗰個紅色好靚」嗰個 vendor 望住我嗰個眼神好似等咗好耐終於有人欣賞佢咁佢即刻再印多十頁比我睇頁頁都係嗰隻紅色。呢個唔係影印機呢個係印刷嚟㗎。但係！！！八月佢日本 Tatsuno 碳粉廠爆炸！！！你冇聽錯係爆炸！！！靜電引起粉塵爆燃。成間廠停產到十一月先復返少少產能仲要得返七成半。我問 vendor 有冇碳粉佢話排隊可能排到過年。你買咗個豪宅但入伙日一拖再拖到你收到匙都唔知陳設仲係咪你當初揀嗰套。你哋有人要印靚嘅 brochure proposal 嗰啲就真係得佢做到但你普通日常印你喺豪宅入面淨係用嚟訓覺你知唔知幾嘥。何況而家碳粉都未必有。
KYOCERA
居屋。我知你哋聽到居屋冇反應。但你知唔知居屋管理費幾平。KYOCERA 最出名嘅嘢係佢個碳粉鼓標稱壽命十萬頁以上有啲型號講到二十萬頁。碳粉鼓即係部機入面負責將碳粉印上紙嘅嗰個筒，你唔使理佢係乜你只需要知道其他 brand 呢個筒大概五萬頁就要換一次換一次幾百蚊到千幾蚊。KYOCERA 唔使換。你淨係需要換碳粉壺即係入面嗰樽粉個壺仲要平。呢個 setup 令到佢嘅長期使用成本可以平過其他 brand 三四成。佢喺香港做咗三十幾年服務中心有。但型號少揀嚟揀去得幾款功能夠用唔會多。你問佢有咩特別佢話冇但你問佢有咩唔好佢都話冇。你唔會同人講你嘅 printer 係 KYOCERA 好正但你每月支出最輕。邊間分行銀紙唔夠嘅就買佢交差冇人會話你揀錯但亦冇人會話你揀得好。
Sharp
工廈。你以為好 cheap 但其實入面間得幾好用。只係你同人講你用 Sharp 大家冇反應。喺辦公室影印機市場佢屬於配角有啲中低端機款性價比唔錯維修方便唔會 jam 到你發癲。冇乜好講佢存在就係佢最大嘅特色。銀紙唔夠但要有部機你就買佢。
我已經覺得冇人會睇到呢度
但係我想搞個投票。何生話「你鍾意搞咪搞反正 management 決定」。我知。我知 management 決定。但日日用部機嘅人係我哋唔係 management。我 jam 紙 jam 到手指夾到瘀血嘅係我唔係佢哋。
回覆打個英文字母
A Ricoh
B Canon
C Fuji Xerox
D Konica Minolta
E KYOCERA
F Sharp
G 修返舊嗰部算
我會收集結果整份報告攞俾何生佢理唔理我控制唔到。但起碼我做咗。你下次 jam 紙嗰陣就關你事。
[由舊站搬遷恢復，附件與收藏資料未完全同步]
